ཉིན་ཤས་གོང་མཚོ་སྣ་གྲོང་ཁྱེར་ནད་ཡམས་སྔོན་འགོག་དང་ཚོད་འཛིན་ལྟེ་གནས་ཀྱིས་ལས་དོན་མི་སྣ་སྒྲིག་འཛུགས་བྱས་ཏེ། མཚོ་སྣ་གྲོང་ཁྱེར་གྱི་སློབ་གྲྭ་འབྲིང་ཆུང་དང་བུ་བཅོལ་ཁང་ཁག་ཏུ་བསྐྱོད་དེ་འགོ་ནད་སྔོན་འགོག་ཚོད་འཛིན་དང་བདེ་ཐང་སློབ་གསོའི་དྲིལ་བསྒྲགས་བྱེད་སྒོ་སྤེལ་བ་རེད།
བྱེད་སྒོ་སྤེལ་རིང་། མཚོ་སྣ་གྲོང་ཁྱེར་ནད་ཡམས་སྔོན་འགོག་དང་ཚོད་འཛིན་ལྟེ་གནས་ཀྱི་ཆེད་ལས་སྒྲོག་འགྲེལ་ཚོགས་པས་དཔྱིད་དུས་ཐོན་མང་བའི་ཆམ་རིམས་དང་། འགོ་ཤུགས་ཆེ་བའི་འགྲམ་ནད། ཆུ་ཐོར། ཁ་ཚ་སྨིག་ཚའི་ནད་སོགས་འགོ་ནད་གཙོ་བོའི་ནད་ཐོག་ནད་རྟགས་དང་། འགོ་ལམ། འགོག་བཅོས་བྱེད་ཐབས་སོགས་ལ་ཕྱོགས་ཡོངས་ནས་འགྲེལ་བཤད་ཞིབ་ཕྲ་བརྒྱབ་ཡོད་པ་རེད།